XƏBƏRLƏR

Səməd Vurğunun ailəsi ilə məşhur market arasında qalmaqal

«Oba» marketlər şəbəkəsinin yayımladığı reklam çarxı narazılıqlara səbəb olub.

PrimeTime.Az xəbər verir ki, reklam çarxı Azərbaycanın görkəmli xalq şairi Səməd Vurğunun «Azərbaycan» şeirindən götürülmüş misraların dəyişdirilməsi əsasında çəkilib. Bu isə Səməd Vurğunun ailəsində böyük narazılıq yaradıb.

Məsələ ilə bağlı açıqlama verən şairin nəvəsi Nigar Vəkilova belə bir reklamın çox iyrənc və səviyyəsiz olduğunu bildirib: «Mən bu məsələni eşidən kimi Səməd Vurğunun ev muzeyinin direktoru Nüşabə xanım Vəkilovaya xəbər verdim. Axı bu cür şeirin misralarının bir hissəsini dəyişdirib belə bir aşağılayıcı reklamda necə çəkib yayımlaya bilərlər ki? Kənardan çox iyrənc görünür. Biz bu səviyyəsiz reklam çarxı ilə bağlı ciddi tədbirlər görəcəyik. İlk tələbimiz o reklamın yayımının dayandırılmasıdır. Məhkəməyə müraciət etməyi də düşünürük, amma hələ müraciət etməmişik». Xatırladaq ki, «Azərbaycan» şeiri 1933-cü ildə yazılıb. 1959-cu ildə şeir «SSRİ xalqları ədəbiyyatı üzrə müntəxəbat»a daxil edilib. Şeirin sözlərinə bəstəkar Ələkbər Tağıyev tərəfindən eyniadlı «Azərbaycan» mahnısı bəstələnib.

Qeyd edək ki, sözügedən reklam çarxı «El bilir ki, sən mənimsən, alış-veriş mərkəzimsən» misraları əsasında hazırlanıb və bir neçə radioda yayımlanır.

***

«Oba» marketlər şəbəkəsi məsələ ilə bağlı açıqlama verib.

ŞəbəkədənBakuPost.az-a daxil olan açıqlamada bildirilib ki, sözügedən reklam çarxının dayandırılmağı tələb edilib: «Bu iş radiolardan birinə həvalə edilmişdi. Bu gündən etibarən reklam çarxının yayımının dayanmasını tələb etmişik. Əlavə olaraq bildirmək istəyirik ki, şairin nəvəsi Nigar xanımla da əlaqə saxladıq. «Oba» marketlər şəbəkəsi adından yaranan anlaşılmazlığa görə üzrümüzü qəbul etməsini xahiş etdik. Nigar xanım bizim üzürxahlığımızı qəbul etdi».

Paylaş:
Загрузка...